Мірныя перамовы, якія пачаліся паміж Украінай і Расіяй у канцы лютага 2022 года, сарваліся з некалькіх прычын. Хоць першапачаткова Уладзімір Зяленскі ў абмен на мір гатовы быў адмовіцца ад уступлення краіны ў NATO і ад тэрыторыі, піша Time.
Як піша выданне, сустрэўшыся ўпершыню на поўдні Беларусі ў раёне мяжы з Украінай, праз шэсць тыдняў перамоўнікі дасягнулі згоды што да дэталяў мірнага пагаднення. У абмен на надзейныя «гарантыі бяспекі» ад Расіі і іншых краін Украіна пагадзілася б адмовіцца ад планаў уступлення ў NATO і прыняць статус «пастаяннага нейтралітэту». Гэта дазваляла Пуціну заявіць пра хаця б частковую перамогу, бо яго галоўным апраўданнем уварвання было жаданне не дапусціць уступлення Украіны ў Альянс, і Зяленскі гатовы быў выканаць гэтае яго жаданне. Прэзідэнт Украіны таксама быў гатовы адмовіцца ад тэрыторыі ў абмен на мір, сцвярджае выданне.
Крэмль, падобна, быў гатовы разгледзець гэтыя ўмовы. Аднак да канца красавіка 2022 года мірны працэс сарваўся з некалькіх прычын. Украінскія перамоўнікі былі ў жаху ад масавых злачынстваў, учыненых расійскімі войскамі, асабліва ў Бучы, і заклікалі Зяленскага выйсці з перамоваў, піша Time. Са свайго боку заходнія саюзнікі адмовіліся даваць якія-кольвек цвёрдыя абяцанні, што дапамогуць спыніць новае магчымае ўварванне Расіі ў будучыні. А без такіх гарантый з боку Захаду ўкраінцам давялося б спадзявацца толькі на добрасумленнасць расейцаў.
«Яны фактычна параілі нам не займацца эфемернымі гарантыямі бяспекі», — расказаў лідар фракцыі «Слуга народа» ў Вярхоўнай радзе Давід Арахамія, які ўзначальваў дэлегацыю Украіны на перамовах з Расіяй.
Яшчэ адной прычынай зрыву перамоваў сталі поспехі на полі бою, якіх удалося дасягнуць Украіне. Той вясной УСУ адстаялі Кіеў, вымусіўшы захопнікаў сысці прыкладна з паловы акупаваных імі земляў. Увосень, калі расіяне пацярпелі паразу на Харкаўшчыне і ў Херсоне, саюзнікі Украіны заклікалі Уладзіміра Зяленскага скарыстацца момантам і аднавіць мірныя перамовы з пазіцыі сілы.
Аднак Зяленскі праігнараваў параду, палічыўшы, што Украіне і далей будзе спадарожнічаць поспех, а значыць — навошта спыняцца. Тым не менш ён не мог ігнараваць ціск з боку сваіх саюзнікаў, якія заклікалі яго разгледзець шляхі дасягнення пагаднення з Пуціным. У якасці кампрамісу Зяленскі прапанаваў сваю «формулу міру», магчыма, самым важным пунктам якой стала патрабаванне, каб Расія пакінула ўкраінскую зямлю, уключаючы тэрыторыі, акупаваныя з 2014 года, піша Time.
