Расійскі стратэгічны бамбавік Ту-22М3, які ўпаў у Стаўрапальскім краі, быў знішчаны УСУ. Пра гэта заявіў камандуючы Паветранымі сіламі Украіны Мікалай Аляшчук.
«Упершыню зенітныя ракетныя падраздзяленні Паветраных сіл ва ўзаемадзеянні з Галоўным упраўленнем разведкі МА Украіны знішчылі далёкі стратэгічны бамбавік Ту-22М3 — носьбіт крылатых ракет Х-22, якімі расійскія тэрарысты б’юць па мірных украінскіх гарадах», — заявіў Аляшчук.
Ва УСУ таксама заявілі, што гэты самалёт удзельнічаў у начной атацы ва Украіну.
«Гэта першы самалёт стратэгічнай авіяцыі, які ўдалося знішчыць Украіне падчас палёту. Ён наносіў удары па Украіне», — расказала «РБК-Украіна» крыніца ў Сілах абароны.
Паводле яе, знішчэнне Ту-22МЗ — гэта аперацыя ГУР МА. Пасля збіцця бамбавіка іншы, які ляцеў за ім, развярнуўся.
Далёкі звышгукавы ракетаносец-бамбавік Ту-22М3, які разбіўся ў Стаўрапалі і здольны несці ядзерныя зарады, стаў трэцім такім самалётам, які Расія страчвае за час вайны ва Украіне і першым, які цярпіць крушэнне ў палёце, падлічыла «Агентство».
Такі самы Ту-22М3 быў страчаны пасля ўдару беспілотніка па вайсковым аэрадроме ў Наўгародскай вобласці 19 жніўня. Яшчэ адзін атрымаў пашкоджанні пасля ўдару БПЛА па аэрадромах у Разанскай і Саратаўскай абласцях у снежні 2022 года.
У сакавіку 2021 года ў бамбавіка на зямлі ў Калужскай вобласці спрацавала сістэма катапультавання, тры чальцы экіпажа загінулі. Два вайскоўцы пазней атрымалі ўмоўныя тэрміны па артыкуле пра парушэнне правілаў палётаў або падрыхтоўкі да іх, што пацягнула гібель людзей (арт. 351 КК РФ).
А ў студзені 2019 года такі самалёт упаў падчас пасадкі ў Аленягорску Мурманскай вобласці, тры чальцы экіпажа загінулі.
Расійскі Ту-22МЗ упаў у Краснагвардзейскім раёне Стаўрапольскага края, лётчыкі катапультаваліся. Мінабароны Расіі прычынай падзення назвала няспраўнасць, заявіўшы, што самалёт вяртаўся «пасля баявога задання» на аэрапорт базавання.
