Некаторым чыноўнікам Слуцкага райвыканкама пагражае пазачарговая атэстацыя. Пра гэта заявіў віцэ-прэм'ер Ігар Петрышэнка перад пачаткам паседжання Нацыянальнай камісіі па правах дзіцяці, якая прайшла ва ўрадзе 31 кастрычніка, паведамляе газета «СБ. Беларусь сегодня».
Ігар Петрышэнка падкрэсліў: адпаведная нарматыўная база ў краіне ёсць, але, відаць, гэтага недастаткова, калі ўсё яшчэ адбываюцца трагедыі з дзецьмі.
«Выпадак, які ўскалыхнуў усю краіну, нашую грамадскасць, які адбыўся ў Слуцкім раёне, кажа пра тое, што ў поўнай меры механізм эфектыўна не спрацоўвае», — заявіў віцэ-прэм'ер.
На камісіі заслухоўвалі службовых асобаў сістэмы аховы здароўя, адукацыі, Міністэрства ўнутраных справаў на прадмет таго, дзе алгарытм узаемадзеяння даў збой, што ў выніку і прывяло да трагедыі.
28 службовых асобаў, якія дапусцілі і своечасова не перадухілілі факт трагедыі, прыцягнутыя да адказнасці — віцэ-прэм'ер не канкрэтызаваў, хто менавіта і да якой адказнасці. Петрышэнка таксама анансаваў правядзенне пазачарговай атэстацыі адпаведных службовых асобаў Слуцкага райвыканкама.
Раней стала вядома, што распачатыя і крымінальныя справы ў дачыненні да службовых асобаў, у абавязкі якіх уваходзіла прафілактыка сямейнага недабрабыту.
Забойства бацькамі трохгадовага дзіцяці ў Слуцку
Нагадаем, у студзені гэтага года дома ў прысутнасці дзвюх сясцёр і брата хлопчыка бацькі рукамі і нагамі збілі дзіця да смерці «шляхам нанясення са значнай сілай множных удараў рукамі і нагамі па галаве і тулаве, дзе размешчаныя жыццёва важныя органы, а таксама па канечнасцях».
Хлопчык нарадзіўся ў 2019 годзе, і літаральна з самага нараджэння яго катавалі. Ён галадаў і быў знясілены. Таксама бацькі, 37-гадовая Анастасія Таратута і 48-гадовы Аляксандр Таратута, абмяжоўвалі яго свабоднае перамяшчэнне, звязваючы яму рукі і ногі.
Псіхалгічна-псіхіятрычная экспертыза, праведзеная мужу і жонцы Таратутам, прызнала абаіх здольнымі асэнсоўваць свае дзеянні.
19 кастрычніка Мінскі абласны суд вынес прысуд бацькам, якія забілі ў Слуцку свайго трохгадовага сына. Іх прызналі вінаватымі ў катаванні і забойстве з асаблівай жорсткасцю групай асобаў заведама малалетняга. Бацьку хлопчыка, 48-гадовага Аляксандра Таратуту, асудзілі на выключную меру — смяротнае пакаранне. Маці хлопчыка, 37-гадовую Анастасію Таратута, — на 25 гадоў пазбаўлення волі.
Пазней прайшло яшчэ адно судовае паседжанне, на якім іх пазбавілі бацькоўскіх правоў на ўсіх іх дзяцей.