Намеснік прадстаўніка Аб’яднанага пераходнага кабінета па транзіце ўлады і кіраўнік Руху «За свабоду» Юрась Губарэвіч даслаў дакументы ў Цэнтрвыбаркам для рэгістрацыі сваёй ініцыятыўнай групы кандыдата ў прэзідэнты. Пра гэта апазіцыйны палітык паведаміў у Facebook увечары 27 кастрычніка.
«Даслаў у ЦВК заяву, спіс ініцыятыўнай групы і іншыя дакументы, неабходныя для рэгістрацыі ў якасці кандыдата на выбарах прэзідэнта Рэспублікі Беларусь. Фармальных абмежаванняў не маю. Крымінальныя справы заводзіліся, але ніводная з іх так і не была даведзена да рашэння суда.
Сабраць 100 тысячаў подпісаў сярод 300−500 тыcяч пакінуўшых Беларусь грамадзян лічу цалкам магчымым. Паглядзім, што далей будзе», — напісаў Губарэвіч.
Яму нагадалі ў каментарах, што пасля чарговай змены Канстытуцыі ў 2022 годзе прэзідэнтам пры цяперашняй уладзе можа быць толькі той, хто «пастаянна пражывае ў Рэспубліцы Беларусь не менш за 20 гадоў непасрэдна перад выбарамі, не мае і не меў раней грамадзянства замежнай дзяржавы альбо віду на жыхарства ці іншага дакумента замежнай дзяржавы, што дае права на льготы і іншыя перавагі».
А Губарэвіч акурат жыве за мяжой.
Нагадаем, прэзідэнцкія выбары прызначаныя ў Беларусі на 26 студзеня 2025 года. Раней намер высунуць сваю кандыдатуру агучыў кіраўнік ЛДПБ Алег Гайдукевіч, але дакументаў у ЦВК пакуль не падаваў.
26 кастрычніка ЦВК прыняў дакументы на рэгістрацыю ініцыятыўнай групы па вылучэнні кандыдатам у прэзідэнты Аляксандра Лукашэнкі. Акрамя таго, у СМІ з’явілася інфармацыя, што былая дэпутатка і кандыдатка ў прэзідэнты на выбарах 2020 года Ганна Канапацкая хоча сабраць ініцыятыўную групу.
Дату выбараў зацвердзілі 23 кастрычніка. Дакументы пра рэгістрацыю ініцыятыўных груп па зборы подпісаў для вылучэння кандыдатаў у прэзідэнты неабходна падаць не пазней за 1 лістапада.
Для вылучэння кандыдатам трэба сабраць не менш за 100 000 подпісаў. Улады традыцыйна выкарыстоўваюць для гэтага адміністрацыйны рэсурс.
Збор подпісаў за вылучэнне ў кандыдаты ў прэзідэнты пачнецца 7 лістапада.
Чытайце таксама
