Чыноўнікі абмяркоўваюць магчымыя змены ў Падатковы кодэкс. Пра некаторыя з іх мы ўжо расказвалі — для тых, хто выязджае на аўто за мяжу, а таксама для шматдзетных сем’яў па маёмасным падатковым выліку. Але гэта яшчэ не ўсе магчымыя новаўвядзенні для насельніцтва — улады таксама хочуць забраць у людзей адну з падатковых ільгот.
Мінфін прапануе адмяніць ільготу па падаходным падатку на даходы, якія фізічныя асобы атрымліваюць ад продажу доляў у статутным фондзе беларускіх арганізацый і іх акцый.
Цяпер гэтыя даходы вызваляюць ад падаходнага збору. Пры гэтым па набытых з 1 студзеня 2014 года акцыях ёсць умова, каб не плаціць падатак падчас іх продажу: чалавек мусіць валодаць імі бесперапынна не менш за тры гады (гэта прапісана ў пункце 35 артыкула 208 Падатковага кодэкса).
Як заявіў першы намеснік міністра фінансаў Дзмітрый Кійко, асноўная прычына адмены гэтай ільготы ў тым, што «прыкметнага эфекту для інвестыцый не адзначаецца, бо сродкі па факце не рэінвестуюцца, а размяркоўваюцца на карысць фізічных асобаў у павышаных памерах». Паводле яго, гэтае магчымае новаўвядзенне не закранае інтарэсаў дзяржарганізацый, бо яны ў абавязковым парадку размяркоўваюць частку прыбытку.
Дзмітрый Кійко таксама паведаміў, што ўлады збіраюцца ў 2025 годзе праіндэксаваць некаторыя падаткі, вылікі і льготы. Так, плануецца карэктаванне ставак падаткаў у рублях. Як чакаецца, павышэнне прывяжуць да інфляцыі. Нагадаем, чыноўнікі прагназуюць, што ў 2025-м цэны вырастуць не больш чым на 5% гадавых.
У рублях устаноўленыя, да прыкладу, стаўкі маёмасных падаткаў — на зямлю, нерухомасць, транспарт.
Як заявілі ў Мінфіне, аналагічным чынам будуць перагледжаныя льготы і вылікі па падаходным падатку.
Чытайце таксама
