З пачатку года з Казахстана ў Беларусь завезлі значна больш, чым звычайна, смартфонаў, камп’ютараў і ноўтбукаў, а таксама хлеба. Пра гэта паведамляе LS са спасылкай на звесткі нацыянальнай статыстыкі.
За першы квартал 2023 года імпарт з Казахстана ў Беларусь прасеў амаль у 16 разоў у параўнанні з аналагічным перыядам мінулага года. Пры гэтым пералік казахскіх тавараў, увезеных у нашую краіну, істотна змяніўся. У ім з’явіліся новыя пазіцыі: легкавыя машыны (84 штукі), аўтапагрузнікі, вадкасныя помпы, шарыкавыя і ролікавыя падшыпнікі.
Адчувальна вырас імпарт смартфонаў і тэлефонаў з Казахстана — у 286 разоў (152 тысячы), хлебабулачных вырабаў — амаль у 100 разоў, камп’ютараў і ноўтбукаў — амаль у 20 разоў.
А вось экспарт з Беларусі ў Казахстан, наадварот, вырас — на 18,3%. Пры гэтым амаль у 133 разы павялічыліся пастаўкі пруткоў з жалеза, у 2,6 разу — дрэва і вырабаў з яго, на 62% — сыроў і тварагу і на 35,3% — каўбас.
Таксама нашая краіна паставіла ў Казахстан амаль у 5 разоў больш, чым за першы квартал мінулага года, газона- і сенакасілак, на 27,7% больш трактароў і на 84,5% больш пластмасаў і вырабаў з іх. Затое экспарт беларускай мэблі абрынуўся на 82,1%, ялавічыны — на 28,3%.
Нагадаем, днямі Мінгандлю ЗША забараніла экспарт у Беларусь і Расію тэлефонаў, дыктафонаў і бытавой тэхнікі, а таксама прамысловых вырабаў — усяго больш за 1220 пазіцый.
Яшчэ раней улады ЗША забаранілі завозіць у Беларусь смартфоны, якія каштуюць больш за 300 даляраў, а заадно бытавыя кавамашыны, кандыцыянеры, мікрахвалевыя печы і іншую тэхніку.