Польшча працягвае дамагацца вызвалення палітзняволенага журналіста і прадстаўніка польскай меншасці Андрэя Пачобута, у тым ліку робіць непублічныя крокі. Пра гэта паведамілі ў МЗС Польшчы 9 студзеня, перадае Polskie Radio.
— Мы няспынна патрабуем яго неадкладнага вызвалення. Мы робім таксама захады, пра якія я не магу публічна гаварыць, — заявіў намеснік міністра замежных справаў Польшчы Павел Яблонскі. — Падобныя захады мы рабілі і ў дачыненні да іншых асобаў, супрацьпраўна арыштаваных у Беларусі. Не ва ўсіх выпадках яны заканчваліся поспехам. Я запэўніваю, што кожны дзень мы дзейнічаем па пытанні вызвалення Андрэя Пачобута і іншых палітвязняў у Беларусі.
У панядзелак, 9 студзеня, Пачобута мусілі пачаць судзіць у Гродзенскім абласным судзе. Але разгляд справы, які мусіў пачацца яшчэ 28 лістапада, чарговы раз перанеслі — цяпер на 16 студзеня.
Нагадаем, гродзенскі журналіст, чалец пазбаўленага рэгістрацыі Саюза палякаў у Беларусі Андрэй Пачобут знаходзіцца за кратамі з 25 сакавіка 2021 года. Яму выстаўленыя абвінавачанні па двух артыкулах КК: арт. 361 (заклікі да дзеянняў, скіраваных на нанясенне шкоды нацыянальнай бяспецы Рэспублікі Беларусь) і арт. 130 (распальванне варожасці або варажнечы). «Распальваньне», сярод іншага, сілавікіўбачылі ў выказванні журналіста пра агрэсію СССР супраць Польшчы ў 1939 годзе. Увосень КДБ занёс Пачобута ў пералік «асоб, якія маюць дачыненне да тэрарыстычнай дзейнасці».
У снежні польская газета Wyborcza ўключыла Андрэя Пачобута ў спіс «герояў 2022 года».
