Аляксандр Лукашэнка практычна страціў голас. Нараду па цэнах 21 снежня ён праводзіў «шэптам», паведаміла прэс-служба палітыка і апублікавала відэа.
Мяркуючы з запісу, Аляксандр Лукашэнка моцна асіп.
— Голасу няма. Таму будзем шэптам праводзіць нараду. Пераносіць яе таксама няма куды — Новы год, — сказаў палітык хрыплым голасам запрошаным на сустрэчу чыноўнікам.
Прэс-служба Лукашэнкі не пракаментавала фізічны стан палітыка, толькі аджартавалася, што «грошы любяць цішыню».
Нагадаем, апошні раз Аляксандр Лукашэнка кепска сябе адчуваў на парадзе ў Маскве 9 траўня, а на ўрачыстасцях да 9 траўня ў Мінску замест яго прамову гаварыў міністр абароны Віктар Хрэнін. На Дзень сцяга, герба і гімна ён наогул не прыйшоў, а яго віншаванне зачытваў прэм’ер-міністр Раман Галоўчанка.
Цягам больш чым пяці дзён яго асяроддзе старанна хавала стан палітыка, сам ён на публіцы не паказваўся, што нарадзіла мноства пытанняў. На шосты дзень Лукашэнку ўсё ж паказалі — з відавочнымі прыкметамі ўсё яшчэ не вырашаных праблем са здароўем. Пазней ён сам растлумачыў, што нібыта перанёс адэнавірус.
Чытайце таксама
